ടെലിവിഷന്‍ പരിപാടികളിലൂടെയും കോമഡി സ്‌കിറ്റുകളിലൂടെയുമാണ് സുബി സുരേഷിനെ പ്രേക്ഷകര്‍ക്ക് സുപരിചിതം. വാ തുറന്നാല്‍ കോമഡി മാത്രം പറയുന്ന സുബി സുരേഷിനെതിരെ വിമര്‍ശനങ്ങളും പരിഹാസങ്ങളും ഒട്ടേറെ വന്നിട്ടുണ്ട്. സൂര്യ ടിവിയിലെ കുട്ടിപ്പട്ടാളം എന്ന പരിപാടി അവതരിപ്പിക്കുന്നതിനു പിന്നാലെയാണ് സുബിക്ക് കൂടുതലായും കളിയാക്കലുകള്‍ കേള്‍ക്കേണ്ടി വന്നത്.എന്നാല്‍, ഉരുളക്കുപ്പേരി പോലെ മറുപടി പറയുന്ന സ്വഭാവമാണ് സുബിക്ക്. കുട്ടിപ്പട്ടാളം എന്ന പരിപാടിയിലൂടെ കുട്ടികളോട് സുബി ചോദിക്കുന്ന ചോദ്യങ്ങള്‍ ചിലര്‍ക്കെങ്കിലും നീരസം ഉണ്ടാക്കുന്നവയാണ്. കുട്ടികളോട് ഇങ്ങനെയൊക്കെ പറയാമോ എന്നാണ് പലരും ചോദിക്കാറുള്ളത്. എന്നാല്‍ അതൊന്നും മുന്‍കൂട്ടി പറയുന്നതല്ലെന്നും അറിയാതെ വന്നു പോകുന്നതാണെന്നും സുബി പറയുന്നു. പ്രമുഖ ഓണ്‍ലൈന്‍ മാധ്യമത്തിനു നല്‍കിയ അഭിമുഖത്തിലാണ് താരം ഇങ്ങനെ പ്രതികരിച്ചത്.
ഞാന്‍ അവതരിപ്പിക്കുന്ന പരിപാടികള്‍ക്ക് ചാനലുകള്‍ ഒരു നിയന്ത്രണവും വയ്ക്കാറില്ല. നല്ല ഫ്രീഡം തരാറുണ്ടെന്ന് പറയുന്ന സുബി, കുട്ടികളോട് ചോദിക്കുന്ന ചോദ്യങ്ങള്‍ അതിരു വിടുന്നുണ്ടോയെന്നു ചോദിച്ചപ്പോള്‍ പറഞ്ഞതിങ്ങനെ. ”കുട്ടികളുമായി ബന്ധപ്പെട്ട കാര്യങ്ങളാണ് ചോദിക്കാറുള്ളത്. എല്ലാം രസകരമായി ചോദിക്കുകയാണ് ചെയ്യാറുള്ളത്. ഇതുവരെ വന്ന രക്ഷിതാക്കള്‍ വിമര്‍ശിച്ചിട്ടില്ല .കുട്ടികളുടെ തമാശ കാണാന്‍ വേണ്ടിയാണ് കുട്ടിപ്പട്ടാളം പ്രേക്ഷകര്‍ കാണുന്നത്. ഒന്നോ രണ്ടോ കുട്ടികളോട് മോശം ചോദിച്ചുവെന്ന് കരുതി അതിനെ വിമര്‍ശിച്ച് ഇരിക്കുന്നത് ശരിയല്ല”
