ലണ്ടൻ: ക്ഷീരപഥത്തിൽ ‘സെഫീഡ്’ എന്നറിയപ്പെടുന്ന ഒരു കൂട്ടം പുതിയ നക്ഷത്രസമൂഹം ജ്യോതിശാസ്ത്രജ്ഞർ കണ്ടെത്തി. യൂറോപ്യൻ സതേൺ ഒബ്സർവേറ്ററി ചിലിയിൽ സ്ഥാപിച്ച പാരനൽ വാനനിരീക്ഷണ കേന്ദ്രത്തിലെ വിസ്റ്റ ടെലിസ്കോപ് 2010നും 2014നുമിടയിൽ ശേഖരിച്ച വിവരങ്ങൾ നക്ഷത്രങ്ങളെ കണ്ടെത്താൻ സഹായിച്ചത്. ക്ഷീരപഥത്തിലെ മധ്യ നക്ഷത്രസമൂഹത്തിൽ പൊടിപടലങ്ങൾക്കിടയിൽ മറഞ്ഞു കിടക്കുകയായിരുന്നു ഇവ.
ക്ഷീരപഥത്തിലെ മധ്യ നക്ഷത്രസമൂഹം പഴക്കം ചെന്ന നക്ഷത്രങ്ങളുടെ കൂട്ടമാണെന്നാണ് ഇതുവരെ കരുതിയിരുന്നത്. എന്നാൽ, ജ്യോതിശാസ്ത്ര മാനദണ്ഡങ്ങളനുസരിച്ച് യുവ നക്ഷത്രങ്ങളെയാണ് പുതുതായി കണ്ടെത്തിയിരിക്കുന്നത്. 655 ചരനക്ഷത്രങ്ങളാണ് ശാസ്ത്രജ്ഞരുടെ കണ്ണിൽപ്പെട്ടത്. ഹ്രസ്വകാലയളവിൽ തീക്ഷ്ണമായി പ്രകാശിക്കുകയും മങ്ങുകയും ചെയ്യുന്നവയാണ് ഈ നക്ഷത്രങ്ങൾ.
പൊന്തിഫിക്ക യൂനിവേഴ്സിഡാഡ് കാതോലിക്ക ഡി ചിലിയിലെ ഇസ്ത്വാൻ ഡെകനിയുടെ നേതൃത്വത്തിലുള്ള ശാസ്ത്രജ്ഞരാണ് കണ്ടെത്തലിന് പിന്നിൽ.
