ഇന്ത്യയില് ഔദ്യോഗിക സന്ദര്ശനത്തിനെത്താനൊരുങ്ങി സൗദി അറേബ്യ കിരീടാവകാശിയും പ്രധാനമന്ത്രിയുമായ അമീര് മുഹമ്മദ് ബിന് സല്മാന് . ഈ ആഴ്ച അവസാനം നടക്കുന്ന പതിനെട്ടാമത് ജി 20 ഉച്ചകോടിയില് പങ്കെടുക്കുന്നതിനായാണ് മുഹമ്മദ് ബിന് സല്മാന് എത്തുന്നത്. ഈയിടെ സൗദി അംബാസഡര് സാലിഹ് അല് ഹുസൈനി ഇന്ത്യന് വിദേശകാര്യമന്ത്രി എസ്. ജയശങ്കറുമായി കൂടിക്കാഴ്ച നടത്തിയിരുന്നു. ഇന്ത്യ-സൗദി അറേബ്യ ബന്ധത്തിന്റെ വിവിധ മേഖലകളിലുള്ള വികസനത്തിനും പുരോഗതിക്കും വേണ്ടി ഉറ്റുനോക്കുകയാണെന്ന് കൂടിക്കാഴ്ചയ്ക്ക് ശേഷം ജയശങ്കര് ട്വീറ്റ് ചെയ്തിരുന്നു. സെപ്റ്റംബര് 9, 10 തിയതികളില് നടക്കുന്ന ഉച്ചകോടിക്കുശേഷം സൗദി കിരീടാവകാശി സെപ്റ്റംബര് 11ന് ഔദ്യോഗിക സന്ദര്ശനം നടത്തും. പ്രധാനമന്ത്രി നരേന്ദ്ര മോദിയുമായി അദ്ദേഹം കൂടിക്കാഴ്ച നടത്തിയേക്കും.