മൈക്കിള് ജാക്സണ് ലൈംഗികമായി പീഡിപ്പിച്ചിരുന്നുവെന്ന ആരോപണവുമായി കൊറിയോഗ്രാഫര് രംഗത്ത്. സണ്ഡാന്സ് ഫിലിം ഫെസ്റ്റിവലില് പ്രദര്ശിപ്പിക്കാനിരിക്കുന്ന ‘ലീവിങ് നെവര്ലാന്ഡ്’ എന്ന ഡോക്യുമെന്ററിയിലാണ് നിര്ണായക വെളിപ്പെടുത്തല്. ഓസ്ട്രേലിയന് സ്വദേശിയായ 36 കാരനായ കൊറിയോഗ്രാഫറാണ് ആരോപണവുമായി രംഗത്തു വന്നിരിക്കുന്നത്. മൈക്കിള് ജാക്സണ് തന്നെ ഏഴ് വര്ഷത്തോളം പീഡിപ്പിച്ചുവെന്നും കൊറിയോഗ്രാഫര് പറഞ്ഞു. ചെറുപ്പത്തില് മുതല് മൈക്കിള് ജാക്സണ് തങ്ങളെ ലൈംഗികമായി ഉപയോഗിച്ചതിനെ കുറിച്ചും അതിജീവനത്തെ കുറിച്ചും ലോകത്തിനു മുന്നില് രണ്ട് യുവാക്കള് വിവരിക്കുന്നതാണ് ഡോക്യുമെന്ററിയുടെ ഉളളടക്കം.
തനിക്കുണ്ടായ നഷ്ടങ്ങള്ക്ക് പകരമായി 2016 ല് മൈക്കിള് ജാക്സണിന്റെ എസ്റ്റേറ്റിനെതിരെ 1.6 ബില്യണ് തുകയുടെ നഷ്ടപരിഹാരക്കേസ് ഇയാള് നല്കിയിരുന്നു. ഏഴാം വയസു മുതല് 14 വയസുവരെ താന് പീഡിപ്പിക്കപ്പെട്ടുവെന്നും കോറിയാഗ്രാഫര് പറയുന്നു. എന്നാല് ആരോപണത്തില് മൈക്കിള് ജാക്സണിന്റെ എസ്റ്റേറ്റിന് ഉത്തരവാദിത്തമില്ലെന്ന് ചൂണ്ടിക്കാട്ടി കേസ് തള്ളുകയായിരുന്നു.