സംസ്ഥാനത്ത് കനത്ത മഴ തുടരുന്നു. കേരള-ലക്ഷദ്വീപ് തീരങ്ങളില് വടക്ക് പടിഞ്ഞാറ് ദിശയില് നിന്നും മണിക്കൂറില് 35 മുതല് 45 കിലോമീറ്റര് വേഗത്തില് കാറ്റ് വീശാന് സാദ്ധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്കിയിട്ടുണ്ട്. കടല് പ്രക്ഷുബ്ധമാകാന് സാധ്യതയുള്ളതിനാല് മത്സ്യത്തൊഴിലാളികള് കടലില് പോകരുതെന്നും നിര്ദ്ദേശം നല്കിയിട്ടുണ്ട്.
മഴയെ തുടര്ന്ന് എറണാകുളം, വയനാട്, പാലക്കാട് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് കലക്ടര്മാര് ഇന്ന് അവധി പ്രഖ്യാപിച്ചു. പാലക്കാട് അങ്കണവാടികള് ഉള്പ്പെടെയുള്ള മുഴുവന് സ്കൂളുകള്ക്കും അവധിയാണെങ്കിലും കോളെജുകള് പ്രവര്ത്തിക്കും. എറണാകുളത്തും വയനാടും പ്രഫഷനല് കോളജ് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധിയാണ്. വയനാട്ടില് അങ്കണവാടികള്ക്ക് അവധിയുണ്ട്.
നേരത്തെ, ശക്തമായ മഴയും ഉരുള്പൊട്ടലും ഉണ്ടായേക്കാമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ് നല്കിയിരുന്നു. ജൂലൈ പതിനേഴ് വരെ തുടര്ച്ചയായി ലഭിക്കുന്ന ശക്തമായ മഴ പെട്ടെന്നുള്ള വെള്ളപ്പൊക്കം, ഉരുള്പൊട്ടല്, മണ്ണിടിച്ചില് എന്നിവയ്ക്ക് കാരണമായേക്കുമെന്നും കാലാവസ്ഥ വകുപ്പ് അറിയിച്ചു.
കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, കാസര്കോട് ജില്ലകളില് ഉരുള്പൊട്ടലിന് സാദ്ധ്യതയുണ്ടെന്നും ജാഗ്രത പാലിക്കണമെന്നും കാലാവസ്ഥ വകുപ്പ് മുന്നറിയിപ്പ് നല്കി. കേരള – ലക്ഷദ്വീപ് തീരങ്ങളില് വടക്ക്- പടിഞ്ഞാറ് ദിശയില് നിന്നും മണിക്കൂറില് 35 മുതല് 45 കിലോ മീറ്റര് വേഗതയില് കാറ്റടിക്കാന് സാദ്ധ്യതയുണ്ടെന്നും മുന്നറിയിപ്പുണ്ട്.