മുംബൈ: ഓണ്‍ലൈന്‍ വഴി ഓര്‍ഡര്‍ ചെയ്ത ചില്ലി പനീറിനൊപ്പം ലഭിച്ച വസ്തുകണ്ട് ഞെട്ടിയിരിക്കുകയാണ് ഒരു യുവതി. ലഭിച്ചത് മറ്റൊന്നുമല്ല, ഒരു കോണ്ടം. ജംഷഡ്പൂരിലാണ് സംഭവം. അവിടുത്തെ ദോശ ഹട്ട് എന്ന റെസ്‌റ്റോറന്റിലാണ് യുവതി ഗ്രേവികാര്‍ട്ട്.കോം വഴി സ്പ്രിങ് റോള്‍ ദോശയും ചില്ലി പനീറും ഓര്‍ഡര്‍ചെയ്തത്. രാത്രി 8.45 ന് ഓര്‍ഡര്‍ ചെയ്ത ഭക്ഷണം 9.20 ന് തന്നെ ലഭിച്ചു. എന്നാല്‍ ചില്ലിപനീര്‍ പായ്ക്കറ്റ് തുറന്നപ്പോള്‍ ഉള്ളില്‍ കണ്ടത് കോണ്ടം. ഉടന്‍ തന്നെ യുവതി ഇക്കാര്യം റെസ്റ്റോറന്റില്‍ വിളിച്ച് പരാതിപ്പെട്ടു.
പരാതി ലഭിച്ച ഉടനെതന്നെ ഡെലിവറി ബോയ് വന്ന് ഭക്ഷണം തിരിച്ചെടുത്തു. അതേസമയം ഇത് യുവതി സ്വയം കെട്ടിച്ചമച്ച ആരോപണമാണെന്ന് ദോശ ഹട്ട് റെസ്റ്റോറന്റ് ഉടമ സുദീപ് ദത്ത അഭിപ്രായപ്പെട്ടു. തെറ്റ് സംഭവിച്ചത് തങ്ങളുടെ ഭാഗത്തുനിന്നല്ലെന്നും വെബ്‌പോര്‍ട്ടലിന്റേതാണെന്നുമാണ് ഹോട്ടല്‍ തൊഴിലാളികള്‍ പറയുന്നത്. റെസ്റ്റോറന്റ് സാധാരണ നല്‍കുന്നത് ആറ് കഷ്ണങ്ങളുള്ള ചില്ലി പനീറാണെന്നും എന്നാല്‍ തിരികെ കൊണ്ടുവന്നപ്പോള്‍ മൂന്ന് കഷ്ണങ്ങള്‍ മാത്രമേ ഉണ്ടായിരുന്നുള്ളെന്നും ഇത് ആരുടെ കുഴപ്പം കൊണ്ട് സംഭവിച്ചതാണെന്ന് അറിയില്ലെന്നും ഗ്രേവികാര്‍ട്ട് ഉടമ നിതിന്‍ ശര്‍മ വ്യക്തമാക്കി. ഡെലിവറി ബോയിയെ വിശദമായി പരശോധിച്ചെന്നും എന്നാല്‍ അയാളെ സംശയിക്കാവുന്ന വിധം ഒന്നും കണ്ടെത്താന്‍ കഴിഞ്ഞില്ല. കഴിഞ്ഞ മൂന്ന് നാല് മാസങ്ങളായി അയാള്‍ ഇവിടെ ജോലിചെയ്യുകയാണ്. ഇതിനുമുന്‍പ് ഒരിക്കലും ഇങ്ങനൊരു സംഭവം ഉണ്ടായിട്ടില്ല. എന്നാലും അയാളെ ഇപ്പോള്‍ പുറത്താക്കിയിരിക്കുകയാണ്. യുവതിയുടെ ഒരു സുഹത്താണ് ഫെയ്‌സ്ബുക്ക് വഴി ഇക്കാര്യം പുറംലോകത്തെ അറിയിച്ചത്.
