ടോക്കിയോ പാരാലിന്പിക്സില്‍ ഇന്ത്യക്ക് ഹാട്രിക് മെഡല്‍. ഇന്നലെ ട്രിപ്പിള്‍ മെഡല്‍ നേടാനായത് ഇന്ത്യക്ക് അഭിമാനമായി.രണ്ട് വെള്ളിയും ഒരു വെങ്കലവും ഇന്ത്യന്‍ താരങ്ങള്‍ ഇന്നലെ സ്വന്തമാക്കി. വനിതകളുടെ ടേബിള്‍ ടെന്നീസ് ക്ലാസ് ഫോറില്‍ ഭവിന പട്ടേലും പുരുഷ വിഭാഗം ഹൈജംപ് ടി 47ല്‍ എന്‍.കെ. നിഷാദ് കുമാറുമാണ് ഇന്നലെ ടോക്കിയോയില്‍ ഇന്ത്യക്ക് ഇരട്ട വെള്ളി സമ്മാനിച്ചത്. പുരുഷ വിഭാഗം ഡിസ്കസ്ത്രോ എഫ് 52ല്‍ വി.കെ. വിനോദ് കുമാറിലൂടെ വെങ്കലവുമെത്തി. പാരാലിന്പിക്സ് ചരിത്രത്തില്‍ ഇന്ത്യക്കായി മെഡല്‍ നേടുന്ന രണ്ടാമത്തെ വനിതയാണ് മുപ്പത്തിനാലുകാരിയായ ഭവിന. 2016 റിയൊ പാരാലിന്പിക്സില്‍ വനിതാ ഷോട്ട്പുട്ട് എഫ് 53ല്‍ വെള്ളി നേടിയ ദീപ മാലിക്കാണ് മുന്പ് ഈ നേട്ടം സ്വന്തമാക്കിയത്.
പുരുഷ ഹൈജംപ് ടി 47ല്‍ ഏഷ്യന്‍ റിക്കാര്‍ഡോടെ നിഷാദ് കുമാര്‍ വെള്ളിയണിഞ്ഞു. 2.06 മീറ്റര്‍ ഉയരം ഇരുപത്തൊന്നുകാരനായ നിഷാദ് മറികടന്നു. അട്ടിമറികളിലൂടെ ടേബിള്‍ ടെന്നീസ് ഫൈനലിലെത്തിയ ഭവിന ഫൈനലില്‍ ലോക ഒന്നാം നന്പര്‍ താരമായ ചൈനയുടെ ഷൗ യിംഗിനു മുന്നില്‍ മുട്ടുമടക്കി. ഗ്രൂപ്പ് ഘട്ടത്തിലെ ആദ്യ മത്സരത്തിലും ചൗ യിംഗിനു മുന്നില്‍ ഇന്ത്യന്‍ താരം തോല്‍വി സമ്മതിച്ചിരുന്നു.
