കിംഗ്‌സ് ഇലവന് പഞ്ചാബിനെതിരേ മുംബൈ ഇന്ത്യന്‍സിനു മൂന്നു റണ്സ് ജയം. പ്ലേ ഓഫ് പ്രതീക്ഷകള്‍ നിലനിര്‍ത്താന്‍ മുംബൈയ്ക്കും പഞ്ചാബിനും ജയം അനിവാര്യമായിരുന്നു. സ്വന്തം തട്ടകമായ മുംബൈ വാംഖ്‌ഡെ സ്‌റ്റേഡിയത്തില്‍ നടന്ന മത്സരത്തില്‍ ആദ്യം ബാറ്റുചെയ്‌ത ആതിഥേയര്‍ നിശ്‌ചിത 20 ഓവറില്‍ എട്ടു വിക്കറ്റ്‌ നഷ്‌ടത്തില്‍ 186 റണ്‍സാണ്‌ നേടിയത്‌. തുടര്‍ന്നു മറുപടി ബാറ്റിങ്‌ ആരംഭിച്ച പഞ്ചാബ്‌ കിങ്‌സ് ഇലവന് അഞ്ചു വിക്കറ്റ്‌ നഷ്‌ടത്തില്‍ 183 റണ്സ് നേടാനേ കഴിഞ്ഞുള്ളു.
ഒരുഘട്ടം വരെ വിജയപ്രതീക്ഷ നിലനിര്‍ത്തിയ കിംഗ്‌സ് ഇലവന് പഞ്ചാബിന് കെ.എല്‍. രാഹുലിന്‍റെ (60 പന്തില്‍ 94) പുറത്താകലാണ് തിരിച്ചടിയായത്. അവസാന രണ്ട് ഓവറിലാണ് കളി മാറിമറിഞ്ഞത്. 19-ാം ഓവറിന്‍റെ മൂന്നാം പന്തില്‍ രാഹുല്‍ പുറത്തായി. പഞ്ചാബിനുവേണ്ടി ആരോണ്‍ ഫിഞ്ച് (35 പന്തില്‍ 46) മികച്ച പ്രകടനം നടത്തി. അക്ഷര്‍ പട്ടേലും(10), മനോജ് തിവാരിയും (4) പുറത്താകാതെ നിന്നു. ബുംറ മൂന്നും മിച്ചല്‍ മാക്ലെന്‍ഹാന്‍ രണ്ടു വിക്കറ്റും വീഴ്ത്തി.
