ഡല്ഹിയിലെ മാല്വിയ നഗറിലെ ഗോഡൗണില് വന് അഗ്നിബാധ. ഗോഡൗണിനു സമീപം പാര്ക്ക് ചെയ്തിരുന്ന ട്രക്കില്നിന്നാണ് തീപടര്ന്നതെന്നാണ് പോലീസ് കരുതുന്നത്. ഈ ട്രക്കില് റബര് ലോഡ് ചെയ്തിരിക്കുകയായിരുന്നു. ശക്തമായ കാറ്റില് തീ ആളിപ്പടര്ന്നു. പ്ലാസ്റ്റിക്കും അസംസ്കൃത വസ്തുക്കളും ശേഖരിച്ചിരുന്ന ഗോഡൗണ് പൂര്ണമായും തീ വിഴുങ്ങി. കഴിഞ്ഞ പതിനാറു മണിക്കൂറുകളിലായി അഗ്നിശമന സേനയുടെ പ്രവര്ത്തനങ്ങള്ക്കും തീ നിയന്ത്രണ വിധേയമാക്കാനായില്ല. ചൊവ്വാഴ്ച വൈകുന്നേരമാണ് തീപിടിത്തം ഉണ്ടായത്. ബുധനാഴ്ച രാവിലെ വ്യോമസേനയുടെ സഹായത്തോടെ തീ നിയന്ത്രണ വിധേയമാക്കാനുള്ള ശ്രമം തുടരുകയാണ്.
ഡല്ഹിയില് അടുത്തകാലത്തുണ്ടായ വലിയ അഗ്നിബാധകളിലൊന്നാണിത്. വ്യോമസേനയുടെ എംഐ-17 ഹെലികോപ്റ്റര് കെട്ടിടത്തിനു മുകളിലൂടെ പറന്ന് വെള്ളം ഒഴിച്ച് തീയണക്കാനുള്ള ശ്രമത്തിലാണ്. മാല്വിയ നഗറില് ഖിര്കിലെ വെയര്ഹൗസില് ചൊവ്വാഴ്ച വൈകുന്നേരം അഞ്ചിനാണ് തീപിടിത്തം ആരംഭിക്കുന്നത്. പ്രദേശത്തെ വീടുകളിലേക്കും സ്കൂളിലേക്കും തീപടരാതിരിക്കാന് രാത്രി മുഴുവനും അഗ്നിശമനസേന പ്രവര്ത്തിക്കുകയായിരുന്നു. 80 ഫയര് എഞ്ചിനുകളാണ് സ്ഥലത്തുണ്ടായിരുന്നത്. എന്നാല് തീ നിയന്ത്രണ വിധേയമാക്കാനായില്ല.