കുവൈത്തില്‍ കൊറോണ വൈറസിന്റെ ഇന്ത്യന്‍ വകഭേദം കണ്ടെത്തി. ഡെല്‍റ്റ വകഭേദം എന്നറിയപ്പെടുന്ന ജനിതക മാറ്റം സംഭവിച്ച കൊറോണ വൈറസ് പരിശോധിച്ച ചില ആളുകളിൽ കണ്ടെത്തിയതായി ആരോഗ്യ മന്ത്രാലയ വക്താവ് ഡോ. അബ്ദുല്ല അല്‍ സനദ് അറിയിച്ചു. കുവൈത്തിലേക്ക് ഇന്ത്യയില്‍നിന്ന് യാത്രാവിമാനങ്ങള്‍ നിര്‍ത്തിയിരിക്കുകയാണ്. അതുകൊണ്ടുതന്നെ ഇന്ത്യയില്‍നിന്ന് നേരിട്ട് കുവൈത്തിലേക്ക് വൈറസ് എത്തിയിരിക്കാന്‍ സാധ്യത കുറവാണ് എന്നാണ് അനുമാനം.
വൈറസുകളുടെ ജനിതക പരിശോധന കൃത്യമായി നടത്തുന്നുണ്ട്. ലോകത്തിലെ വിവിധ രാജ്യങ്ങളില്‍ ജനിതക മാറ്റം സംഭവിച്ച വൈറസ് കണ്ടെത്തിയത് കുവൈത്ത് നിരീക്ഷിക്കുന്നുണ്ട്. ഇവ കുവൈത്തിലെത്താതിരിക്കാന്‍ എല്ലാ ജാഗ്രതയും പുലര്‍ത്തുന്നു. ഇന്ത്യന്‍ വകഭേദത്തിന് വ്യാപന ശേഷി കൂടുതലാണെന്നാണ് വിലയിരുത്തല്‍. കുവൈത്തിലെത്തിയ ഡെല്‍റ്റ വകഭേദം കൂടുതല്‍ പേരിലേക്ക് വ്യാപിക്കാതിരിക്കാനുള്ള മുന്‍കരുതല്‍ സ്വീകരിച്ചിട്ടുണ്ടെന്നും ഡോ. അബ്ദുല്ല അല്‍ സനദ് കുവൈത്ത് വാര്‍ത്താ ഏജന്‍സിയോട് പറഞ്ഞു.
