കോവിഡ് ബാധിച്ച്‌ മരിച്ച പ്രവാസി കുടുംബങ്ങള്‍ക്ക് നഷ്ടപരിഹാരം നല്‍കുന്ന കാര്യത്തില്‍ അടിയന്തരമായി തീരുമാനമെടുക്കാന്‍ കേന്ദ്ര സര്‍ക്കാറിന് ഡല്‍ഹി ഹൈകോടതി നിര്‍ദേശം. ഈ വിഷയവുമായി ബന്ധപ്പെട്ട് പ്രവാസി ലീഗല്‍ സെല്‍ ഗ്ലോബല്‍ പ്രസിഡന്‍റ് അഡ്വ. ജോസ് അബ്രഹാം നല്‍കിയ പൊതുതാല്‍പര്യ ഹര്‍ജിയിലാണ് ചീഫ് ജസ്റ്റിസ് ഡി.എന്‍. പട്ടേല്‍ അധ്യക്ഷനായ ഡിവിഷന്‍ ബെഞ്ചിെന്‍റ നിര്‍ദേശം. പ്രവാസി ലീഗല്‍ സെല്ലിനുവേണ്ടി അഡ്വ. വിഘ്നേഷ് ഹാജരായി.
കോവിഡ് ബാധിച്ച്‌ മരിച്ച പ്രവാസികളുടെ കുടുംബങ്ങള്‍ക്കുകൂടി ധനസഹായം നല്‍കുക, കോവിഡ് മഹാമാരിമൂലം വിദേശത്ത് മരിച്ച ഇന്ത്യന്‍ പ്രവാസികളുടെ കണക്കുകള്‍ കൃത്യമായി ശേഖരിച്ച്‌ തുടര്‍നടപടികള്‍ക്കായി കേന്ദ്ര സര്‍ക്കാറിന് സമര്‍പ്പിക്കാന്‍ ഇന്ത്യന്‍ നയതന്ത്ര മിഷനുകള്‍ക്ക് നിര്‍ദേശം നല്‍കുക, കോവിഡ്മൂലം വിദേശത്ത് മാതാപിതാക്കള്‍ മരിച്ച പ്രവാസികളുടെ ഇന്ത്യക്കാരായ കുട്ടികള്‍ക്ക് പി.എം കെയര്‍ ഫണ്ടില്‍നിന്ന് സാമ്ബത്തിക സഹായം നല്‍കുക എന്നീ ആവശ്യങ്ങള്‍ ഉന്നയിച്ചാണ് ഹരജി നല്‍കിയത്. സുപ്രീംകോടതി ആദ്യം അനുവദിച്ച സമയപരിധി തീര്‍ന്നിട്ടും പ്രവാസികള്‍ക്ക് അനുകൂലമായ നിലപാട് വൈകിയതിനാലാണ് പ്രവാസി ലീഗല്‍ സെല്‍ ഡല്‍ഹി ഹൈകോടതിയെ സമീപിച്ചത്.
