ഛത്തീസ്ഗഡില് മാവോയിസ്റ്റുകളുമായി നടന്ന ഏറ്റുമുട്ടലില് അതിര്ത്തിരക്ഷാസേന (ബി.എസ്.എഫ്)ലെ രണ്ട് ജവാന്മാര് വീരമൃത്യു വരിച്ചു. കാങ്കര് ജില്ലയിലെ മഹ്ലാ ക്യാമ്പിന് സമീപത്തെ വനത്തിലാണ് ഏറ്റുമുട്ടലുണ്ടായത്. രാജസ്ഥാനില് നിന്നുള്ള കോണ്സ്റ്റബിള് ലോകന്ദര് സിംഗ്, പഞ്ചാബില് നിന്നുള്ള മുഖ്ത്യാര് സിംഗ് എന്നിവരാണ് മരിച്ചത്. സന്ദീപ് ഡേ എന്ന കോണ്സ്റ്റബിളിന് പരിക്കേറ്റിട്ടുണ്ട്.
മാവോയിസ്റ്റുകള്ക്കായി തിരച്ചില് നടത്തിയ ശേഷം മടങ്ങിവരികയായിരുന്ന ബി.എസ്.എഫിന്റെ 114-ാം ബറ്റാലിയനു നേരെയാണ് ആക്രമണം ഉണ്ടായത്. റായ്പൂരില് നിന്ന് 250 കിലോമീറ്റര് അകലെയുള്ള ബര്കോട്ട് ഗ്രാമത്തില് പട്രോളിംഗ് നടത്തുന്നതിനിടെ ഒളിച്ചിരുന്ന മാവോയിസ്റ്റുകള് ജവാന്മാര്ക്കു നേരെ വെടിയുതിര്ക്കുകയായിരുന്നു. ജവാന്മാര് പ്രത്യാക്രമണം നടത്തിയതോടെ മാവോയിസ്റ്റുകള് വനത്തിലേക്ക് രക്ഷപ്പെട്ടു.