കേരള-തമിഴ്നാട് സന്ദര്ശനത്തിനായി എത്തുന്ന പ്രധാനമന്ത്രി നരേന്ദ്ര മോദി ഇന്ന് മധുരൈ എയിംസ് ആശുപത്രിയുടെ തറക്കല്ലിടല് ചടങ്ങ് നിര്വഹിക്കും. ഇതിനിടെ തമിഴ്നാട് ബിജെപിക്ക് തലവേദന സൃഷ്ടിച്ച് പ്രധാനമന്ത്രിക്കെതിരെ സാമൂഹിക മാധ്യമങ്ങളില് വ്യാപക പ്രതിഷേധം. ഗോ ബാക്ക് മോദി എന്ന ഹാഷ് ടാഗോടേയാണ് വിവിധ തമിഴ് സംഘടനകളുടെ നേതൃത്വത്തിലുള്ള പ്രതിഷേധം.
തമിഴ്നാടിന്റെ ഭൂപടത്തില് പെരിയാറിന്റെ ചിത്രം ആലേഖനം ചെയ്ത കാര്ട്ടൂണോട് കൂടിയാണ് മോദിക്കെതിരെയുള്ള പ്രതിഷേധം പ്രചരിക്കുന്നത്. സംസ്ഥാനത്ത് വ്യാപക നാശനഷ്ടമുണ്ടാക്കിയ ഗജ ചുഴലിക്കാറ്റിനെ തുടര്ന്ന് തമിഴ് ജനതയെ സഹായിക്കാന് കേന്ദ്ര സര്ക്കാര് തയ്യാറായില്ലെന്നാണ് പ്രതിഷേധക്കാരുടെ പ്രധാന ആരോപണം. ഗജ ചുഴലിക്കാറ്റില് മൂന്ന് ലക്ഷത്തോളം പേര്ക്ക് വീട് നഷ്ടമാക്കിയിരുന്നു. കൂടാതെ തൂത്തുക്കുടി സ്റ്റെര്ലൈറ്റ് വിരുദ്ധ സമരത്തിനിടെ 13 പേര് പോലീസിന്റെ വെടിയേറ്റ് മരിക്കാനിടയായ സംഭവത്തില് പ്രധാനമന്ത്രി മൗനം പാലിച്ചു. കാവേരി ജല തര്ക്കത്തില് കേന്ദ്രം കര്ണാടകക്ക് അനുകൂലമായ നിലപാടെടുത്തു തുടങ്ങിയ ആരോപണങ്ങളും പ്രതിഷേധക്കാര് ഉയര്ത്തുന്നുണ്ട്.
കഴിഞ്ഞ വര്ഷം പ്രധാനമന്ത്രി ചെന്നൈയിലെത്തിയിരുന്ന സന്ദര്ഭത്തിലും സമാനമായ പ്രതിഷേധം ഉയര്ന്നിരുന്നു. അന്ന് പ്രധാനമന്ത്രി പങ്കെടുത്ത പരിപാടിക്ക് സമീപത്തായി കറുത്ത ബലൂണുകള് ആകാശത്തേക്ക് പറത്തിക്കൊണ്ടാണ് പ്രതിപക്ഷ സംഘടനകള് പ്രതിഷേധിച്ചത്.