കോഴിക്കോട് എന്ഡിഎ സ്ഥാനാര്ത്ഥി പ്രകാശ് ബാബുവിന് ഹൈക്കോടതി ജാമ്യം അനുവദിച്ചു. മൂന്നു മാസത്തേക്കു പത്തനംതിട്ട ജില്ലയില് പ്രവേശിക്കരുതെന്ന വ്യവസ്ഥയിലാണ് ഹൈക്കോടതി പ്രകാശ് ബാബുവിനു ജാമ്യം അനുവദിച്ചത്. ശബരിമലയില് സ്ത്രീയെ ആക്രമിച്ച കേസിലാണ് കോഴിക്കോട്ടെ എന്ഡിഎ സ്ഥാനാര്ത്ഥിയും യുവമോര്ച്ച സംസ്ഥാന അദ്ധ്യക്ഷനുമായ പ്രകാശ് ബാബുവിനെ കഴിഞ്ഞ മാര്ച്ച് 28ന് 14 ദിവസത്തേയ്ക്ക് കോടതി റിമാന്ഡ് ചെയ്തത്. ചിത്തിര ആട്ട വിശേഷ ദിവസം ശബരിമലയില് എത്തിയ തൃശൂര് സ്വദേശിനിയായ ലളിത എന്ന സ്ത്രീയെയായിരുന്നു പ്രകാശ് ബാബുവും സംഘപരിവാര് പ്രവര്ത്തകരും ചേര്ന്ന് ആക്രമിച്ചത്. വധശ്രമത്തിനൊപ്പം പ്രേരണാകുറ്റവും ഗൂഢാലോചന കുറ്റവും പ്രകാശ് ബാബു അടക്കം അഞ്ച് സംഘപരിവാര് നേതാക്കള്ക്കെതിരെ പൊലീസ് ചുമത്തിയിരുന്നു. സ്ത്രീയെ ആക്രമിച്ച കേസിലെ രണ്ടാം പ്രതിയാണ് പ്രകാശ് ബാബു.
കൂടാതെ, ശബരിമല ദര്ശനത്തിനെത്തിയ ഭൂമാതാ ബ്രിഗേഡ് നേതാവ് തൃപ്തി ദേശായിയേയും സംഘത്തേയും തടഞ്ഞ സംഭവത്തിലും പൊതുമുതല് നശിപ്പിച്ച കേസിലും നിലയ്ക്കലില് നിരോധനാജ്ഞ ലംഘിച്ചതിനുമെല്ലാം പ്രകാശ് ബാബുവിനെതിരെ കേസുണ്ട്. കൂടാതെ ശബരിമലയില് പ്രായഭേദമന്യേ സ്ത്രീപ്രവേശനം അനുവദിച്ചുള്ള സുപ്രീം കോടതിയുടെ വിധിയുമായി ബന്ധപ്പെട്ട് ദേവസ്വം ബോര്ഡ് അദ്ധ്യക്ഷന്റെ വീട്ടിലേക്ക് മാര്ച്ച് നടത്തിയതടക്കം എട്ടോളം കേസിലും പ്രകാശ് ബാബു പ്രതിയാണ്. കോഴിക്കോട് മണ്ഡലത്തിലെ എന്ഡിഎയുടെ സ്ഥാനാര്ത്ഥിയായ പ്രകാശ് ബാബു യുവമോര്ച്ചയുടെ സംസ്ഥാന അദ്ധ്യക്ഷന് കൂടിയാണ്.