ശബരിമലയില്‍ നടന്ന സംഭവങ്ങളുമായി ബന്ധപ്പെട്ട് മതസ്പര്‍ധ വളര്‍ത്തുന്ന തരത്തില്‍ സമൂഹമാധ്യമങ്ങളില്‍ വ്യാജ പ്രചാരണം നടത്തുന്നവര്‍ക്കെതിരെ പൊലീസ് കേസെടുത്ത് അന്വേഷണം തുടങ്ങി. ഇത്തരത്തില്‍ വ്യാജപ്രചാരണം നടത്തുന്നവര്‍ക്കെതിരെ കേസെടുക്കാന്‍ സംസ്ഥാന പൊലീസ് മേധാവി ലോക്നാഥ് ബെഹ്റ സൈബര്‍, പൊലീസ് വിഭാഗങ്ങള്‍ക്ക് നിര്‍ദേശം നല്‍കിയിരുന്നു. ഇൗ പശ്ചാത്തലത്തിലാണ് നടപടി.
പൊലീസുകാരില്‍തന്നെ മത ചേരിതിരിവ് വരുത്തുന്ന നിലയിലുള്ള പ്രചാരണങ്ങളും സജീവമാണ്. പല യുവതികളും ശബരിമല സന്ദര്‍ശിക്കാനെത്തുന്നെന്നും എല്ലാവരും സംഘടിച്ച്‌ എത്തണമെന്നുമുള്‍പ്പെടെ പ്രചാരണങ്ങള്‍ സജീവമാണ്. അതിന്റെ അടിസ്ഥാനത്തില്‍ തലസ്ഥാനത്ത് എട്ട് പേര്‍ക്കെതിരെ കേസെടുത്തു.
ഇത്തരം സന്ദേശങ്ങള്‍ പോസ്റ്റ് ചെയ്യുകയും പ്രചരിപ്പിക്കുകയും ചെയ്യുന്നവര്‍ക്കെതിരെ കര്‍ശന നടപടി സ്വീകരിക്കുമെന്ന് ഡി.ജി.പി മുന്നറിയിപ്പ് നല്‍കി. കുറച്ചു ദിവസമായി പൊലീസിനും പ്രത്യേകിച്ച്‌ ചില പൊലീസ് ഉന്നതര്‍ക്കുമെതിരെ തെറ്റായ പ്രചാരണങ്ങളാണ് സമൂഹമാധ്യമങ്ങളിലൂടെ നടക്കുന്നത്. വളരെ പ്രകോപനപരമായതും മതസ്പര്‍ധ വളര്‍ത്തുന്നതുമായ സന്ദേശങ്ങളും പ്രചരിക്കപ്പെട്ടു.
