വനത്തിലുണ്ടായ വൻ തീ അണയ്ക്കുന്നതിനിടെ, വനം വകുപ്പിലെ മൂന്ന് ജീവനക്കാർ വെന്ത് മരിച്ചു. ഒരാൾക്ക് പൊള്ളലേറ്റു. ഇയാളുടെ നില ഗുരുതരമല്ല.ഫോറസ്റ്റ് ട്രൈബൽ വാച്ചർ അതിരപ്പിളളി വാഴച്ചാൽ ആദിവാസി കോളനിയിലെ ദിവാകരൻ (43), താത്കാലിക വാച്ചർ പാലക്കാട് കൊടുമ്പ് എടവണവളപ്പിൽ വീട്ടിൽ കുഞ്ഞയ്യപ്പന്റെ മകൻ വേലായുധൻ (54), കൊടുമ്പ് സ്വദേശിയും താത്കാലിക വാച്ചറുമായ വട്ടപ്പറമ്പിൽ അയ്യപ്പന്റെ മകൻ ശങ്കരൻ (48) എന്നിവരാണ് മരിച്ചത്.
ഇന്നലെ രാത്രി ഏഴരയോടെയാണ് മൂന്നു പേരെയും മെഡിക്കൽ കോളേജിൽ എത്തിച്ചത്. ദിവാകരനും വേലായുധനും ആശുപത്രിയിലെത്തും മുമ്പേ മരിച്ചു. നൂറ് ശതമാനത്തോളം പൊള്ളലേറ്റിരുന്ന ശങ്കരനെ ഉടൻ തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും രാത്രി 11.45 ഓടെ മരിച്ചു.
നിസാര പൊള്ളലേറ്റ ഗാർഡ് നൗഷാദിനെ ചെറുതുരുത്തിയിലെ ആശുപത്രിയിൽ പ്രവേശിപ്പിച്ചു.
ദേശമംഗലം പഞ്ചായത്തിലെ പള്ളം കൊറ്റമ്പത്തൂരിലെ എച്ച്.എൻ.എൽ തോട്ടത്തിൽ ഇന്നലെ ഉച്ചയ്ക്കാണ് തീപിടിത്തമുണ്ടായത്.
